Inbasioa izanez gero Irungo konpainiak Bidasoa auzora joaten ziren Irun-Urantzu Unibertsitateko banderarekin. Hantxe izaten ziren inbaditzailearen aurkako lehen guduak, probintziako gainerako tropak iristeko denbora eginez. Horrexegatik eramaten du Bidasoa konpainiak Irungo Bandera "bere eskubideagatik" eta gainerako konpainiek baino teniente bat gehiago du, teniente banderaduna.

Esan daiteke Alardea egiten hasi zenetik bazela konpainia bat "Bidasoa" edo "Bidasoakoa" deiturikoa, alderdi horrek erakusten digu, horrenbestez, Alardean zuen ordena eta Irungo zazpi "auzo historikoetako" konpainietako bat zela.

Hiriko eremu handienetako bat hartzen du konpainia honek: Irungo auzoetan ekialdeen dagoena da eta Behobia, Meaka, Olaberria, Oiartzun, Lesaka eta Iparralde ditu muga. Hala ere, Bidasoa da berez hirigunerik ez duen bakarra, baserriek osatzen baitute guztia.

Bidasoa da San Martzial eguna Irungo erdigunetik urrutien hasten duen konpainietako bat. Konpainia honek Alundan eratzen ditu ilarak, Nafarroako errepidean Bidasoa auzo betean. Ia bakarrik Irungo erdialderantz abiatzen da, bere bandaren musika lagun duela eta San Martzial eguneko egunsentiko lehen argiak bizitzen. Eta nola ez, Irungo bandera eramateko ohorea eta ardura, horixe da konpainia honen ezaugarri nagusia.

Gaur egun, indarrak San Juan plazan bildu ondoren, Jeneralari itxaroten diote tropen kargu egin dadin. Hark, ikuskatu ondoren, Kapitainei deitzeko agindua ematen du haiei beharreko aginduak emateko eta iritziak trukatzeko. Ondoren, hiriko Bandera jasotzeko agindua ematen du Jeneralak. Horixe da Bidasoa konpainiaren unea. Artxeroek eta Danborradak osatutako pikete batek laguntzen dio bandera jaso behar duen Bidasoa konpainiari. Konpainia osoak eskopetak jaitsita desfilatzen du eta musikarik jo gabe, Danborradak jotzen duen Tteiroa besterik ez da entzuten teniente banderadunak bandera jasotzen duen arte eta "Gora Irun! Gora San Martzial! Gora Bidasoa! oihukatu ondoren San Martzial Himnoa entzuten da lehen aldiz ekainaren 30ean.